Já svei mér þá, það munaði minnstu að ég myndi æla í morgun þegar ég renndi yfir fréttirnar á mbl.is - hvað á að gera við svona mannskepnur?? Á ekki orð til að lýsa þessu fyrirbæri. KÆRÐUR Á NÝ FYRIR NAUÐGUN

Er að smíða þessa dagana - eða byrjaði aðeins í gær. Þessar smíðar eru úr orðum og ætlaðar til svars í prófi í mál og ritþjálfun á mánudagsmorgun. Það er nú ein geggjunin - hvernig fer manneskja eins og ég, sem hef pikkað á tölvu í mörg ár, að því að pára 10 bls. á 2 klst. Það verður fróðlegt að lesa - ef hægt verður að lesa það - skrifa nefnilega ekki mjög smekklega og alls ekki þegar ég er að flýta mér - vona að Gsæm og félagar þurfi ekki að sjá þann ófögnuð.

Rakst annars á ótrúlega flottan kveðskap í gærkvöldi - er að hugsa um að leyfa ykkur að njóta með mér - ég er svo mikið fyrir það. Megið líka giska á hvað þessi gífurlega flotta tækni heitir =O)

Drósir ganga, dreyrinn niðar,
drjúpa skúrir.
Rósir anga, reyrinn iðar,
rjúpa kúrir.
           Jóhannes úr Kötlum.

Brakar rekkja, krakkar kurra.
krjúpa sveinar.
Rakar ekkja, rakkar urra,
rjúpa veinar.
            Baldur Hafstað.

Fyrst ég er byrjuð þá er hér ein í viðbót sem ég las fyrir Maron í gærkvöldi þegar við vorum að kúra yfir lærdómnum mínum og rifja upp tröllasýninguna sem var hjá 4.E í gær. Honum fannst hún algjör snilld og skyldi hana vel, ætlaði með hana í skólann og setja upp á vegg =O)

Markvissast, mundi ég segja,
er menntaþorstanum svalað.
ef krakkakvikindin þegja,
svo kennarinn geti talað.
            Jón Thor Haraldsson.

Þeir (kennararnir) þurfa nú ekki að hafa áhyggjur af þessu í fjarnáminu hehe.

Þar sem ég var nær búin að keyra á ljósastaur þegar ég heyrði um skýstrokkinn í London, svipað og Einar Sveinbjörnsson veðurfræðingur og veðurdellukarl, þá fór ég að grúska aðeins á síðunni hans - sem ég skoða stundum til að stytta mér aldur, var nokkuð viss um að hann þyrfti að tjá sig um þann strokk. Rakst þar á fróðlega lesningu um afleiðingar Móðuharðindanna 1783 á veðurfar. HÉR MÁ LESA ÞANN FRÓÐLEIKSMOLA.

Bezt að hætta þessu pikki í bili og fara að snúa sér að lærdómnum, slangur, slettur og Marðar stafsetning uppi á borðum í dag - yndisleg blanda sem getur ekki annað en svæft mig... zzzZZZZzzzZZZZ er svakalega geispuð reyndar, ég bara get ekki farið að sofa á skikkanlegum tíma - uss þetta er alls ekki sniðugt til lengdar.
Knús til ykkar sem hafið gaman að kveðskap og bulli hehe. ***